جہانگیرہ میں افسوسناک ٹریفک حادثہ: کم عمر نوجوان جاں بحق، ایک زخمی
خیبر پختونخوا کے علاقے جہانگیرہ کے مصری بانڈ میں ایک افسوسناک ٹریفک حادثہ پیش آیا، جس کے نتیجے میں ایک کم عمر نوجوان جاں بحق جبکہ ایک شخص زخمی ہو گیا۔
ریسکیو ذرائع کے مطابق حادثہ اس وقت پیش آیا جب ایک واٹر ٹینکر بے قابو ہو کر موٹر سائیکل سواروں پر گر گیا۔ حادثے کے نتیجے میں 15 سالہ روحان عمر موقع پر ہی جاں بحق ہو گئے، جبکہ 24 سالہ شاہزیب عمر، جو کہ اکوڑہ خٹک کے رہائشی ہیں، زخمی ہو گئے۔
ریسکیو 1122 کی ٹیمیں فوری طور پر جائے وقوعہ پر پہنچیں اور زخمی کو ابتدائی طبی امداد فراہم کرنے کے بعد قریبی ہسپتال منتقل کر دیا، جبکہ جاں بحق ہونے والے نوجوان کی لاش بھی ہسپتال منتقل کر دی گئی۔
واقعے کے بعد علاقے میں گہرے دکھ اور افسوس کی فضا قائم ہے، جبکہ حکام کی جانب سے حادثے کی وجوہات جاننے کے لیے تحقیقات کا آغاز کر دیا گیا ہے۔
