سپریم کورٹ اِن چیمبر سماعت: پارلیمنٹ منع کرچکی ہے فنڈز کیسےدیں؟ اٹارنی جنرل
نیوزڈیسک (9نیوز) اسلام آباد
پنجاب انتخابات کیس میں فنڈز کی عدم فراہمی سے متعلق چیف جسٹس عمر عطا بندیال اِن چیمبر سماعت کر رہے ہیں۔
عدالت نے پنجاب میں الیکشن کیلئے فنڈز نہ ملنے پر گورنر اسٹیٹ بینک اور سیکرٹری خزانہ کو طلب کر رکھا ہے۔ اٹارنی جنرل اور سیکرٹری الیکشن کمیشن کو بھی پیش ہونے کی ہدایت کی گئی ہے۔
گورنر اسٹیٹ بینک کو دستیاب وسائل سے متعلق تمام تفصیلات بھی ساتھ لانے کا حکم دیا گیا ہے۔
عدالت کی جانب سے سیکرٹری خزانہ کو ریکارڈ لانے کی ہدایت کی گئی ہے جبکہ سیکرٹری الیکشن کمیشن کو پنجاب اور خیبر پختونخوا کا تمام ریکارڈ فراہم کرنے کا حکم بھی دیا گیا ہے۔
انِ چیمبر سماعت سے قبل وزیراعظم شہباز شریف اور اٹارنی جنرل کی ملاقات ہوئی جس میں الیکشن کیس کی سماعت پر مشاورت کی گئی۔
اٹارنی جنرل منصور عثمان کا اس حوالے سے کہنا تھا کہ پارلیمنٹ نے حکومت کو فنڈز جاری کرنے سے روک دیا ہے،
وفاقی حکومت کے پاس الیکشن کیلئے فنڈز جاری کرنے کا کوئی اختیار نہیں ہے۔ حکومتی مؤقف ان چیمبر سماعت کے دوران پیش کریں گے۔
خیال رہے کہ وزارت خزانہ کی جانب سے پنجاب کے انتخابات کے لیے فنڈز کی فراہمی سے معذرت کرلی گئی تھی۔
وزیر مملکت برائے خزانہ عائشہ غوث نے کہا تھا کہ ملک کی مکمل مالی صورت حال آپ کے سامنے رکھ دی ہے۔ ہم آئی ایم ایف پروگرام میں ہیں مالی خسارہ ہدف میں رکھنے کے پابند ہیں۔
