پاکستانی نژاد امریکی وجیہہ سواتی کے اغواء کامعمہ حل ہوگیا
جائیداد کا تنازع نمٹانے کیلئے 16 اکتوبر کو وطن آنیوالی پاکستانی نژاد امریکی وجیہہ سواتی کے اغوا کا معمہ حل ہوگیا۔ سابق شوہر نے خاتون کو قتل کرکے باپ اور نوکر کی مدد سے ہنگو میں دفن کرنے کا اعتراف کرلیا، پولیس نے لاش برآمد کرلی۔
تقریباً ڈھائی ماہ قبل وجیہہ سواتی جائیداد کا خاندانی تنازع حل کرنے کیلئے امریکا سے پاکستان آئی تھیں، تاہم دو روز بعد ہی لاپتہ ہوگئی، جس کا مقدمہ مقتولہ کے بیٹے نے راولپنڈی کے تھانے میں اغواء کی ایف آئی آر درج کرائی تھی۔
پولیس نے خاتون کی تلاش کیلئے مختلف پہلوؤں سے تفتیش کی اور تقریباً ڈھائی ماہ بعد معمہ حل کرلیا، تفتیش کے دوران پتہ چلا کہ وجیہہ سواتی کو اس کے سابق شوہر نے قتل کیا ہے، جو اسے ایئرپورٹ سے ہی گھر لے گیا تھا۔
پاکستانی نژاد امریکی خاتون وجیہہ سواتی قتل کیس:
وزیر اعلی پنجاب @UsmanAKBuzdar کی راولپنڈی پولیس ٹیم کو شاباش
"تفتیشی ٹیم نے اہم کیس کو پیشہ وارانہ انداز میں حل کیا۔ سی پی او راولپنڈی کی سربراہی میں پولیس ٹیم کاہائی پروفائل کیس کا سراغ لگانا قابل تعریف ہے۔" وزیرِاعلی پنجاب— CM Punjab (Updates) (@CMPunjabPK) December 25, 2021
وزیراعلیٰ پنجاب عثمان بزدار نے اپنے ایک ٹوئٹ میں راولپنڈی پولیس کی انتھک محنت اور تفتیش کو سراہتے ہوئے راولپنڈی پولیس ٹیم کو شاباش دی ہے
سی پی او راولپنڈی ساجد کیانی کے مطابق پولیس کی حراست میں ملزم رضوان نے اپنے جرم کا اعتراف بھی کرلیا اور بتایا کہ اس نے اپنے باپ اور نوکر کی مدد سے مقتولہ کی لاش ہنگو میں دفن کی ہے۔
پولیس کی ٹیم نے ملزم کی نشاندہی پر لاش برآمد کرلی، دونوں سہولت کارو کو بھی گرفتار کرلیا گیا ہے۔
