وفاقی وزیر برائے مذہبی امور مولانا عبدالشکور ٹریفک حادثے میں جاں بحق
نیوز ڈیسک(9نیوز) اسلام آباد
مولانا عبدالشکور میریٹ سے سیکرٹریٹ چوک کی طرف جارہے تھے کہ ایک گاڑی نے مولانا کی گاڑی کو ٹکر ماری، پولیس
وفاقی وزیر مذہبی امور مولانا عبدالشکور ٹریفک حادثے میں جاں بحق ہوگئے۔
پولیس کے مطابق مولانا عبدالشکور اسلام آباد میں نجی ہوٹل سے سیکرٹریٹ چوک کی طرف جارہے تھے کہ ایک تیز رفتار گاڑی نے مولانا عبدالشکور کی گاڑی کو ٹکر ماری۔
ترجمان اسلام آباد پولیس کا کہنا ہے کہ مولانا عبدالشکور کو پولی کلینک ہسپتال منتقل کیا گیا لیکن وہ جانبر نہ ہوسکے۔
ترجمان پولیس کے مطابق مرحوم کی گاڑی کو ٹکر مارنے والی ہائی لکس ریوو میں پانچ افراد سوار تھے جن میں سے تین افراد کو زخمی حالت میں پولی کلینک منتقل کیا جب کہ دو افراد کو کو تھانہ سیکریٹریٹ منتقل کیا گیا ہے۔
آئی جی اسلام آباد پولیس کے علاوہ وفاقی وزیر اطلاعات و نشریات مریم اورنگزیب، وفاقی وزیر مواصلات مولانا اسعد محمود اور دیگر وفاقی وزراء پولی کلینک اسپتال میں موجود ہیں۔
اس ضمن میں آئی جی اسلام آباد پولیس کا کہنا ہے کہ مفتی صاحب اکیلے گاڑی ڈرائیو کررہے تھے، عبدالشکور کا انتقال سَر پر چوٹ آنے سے ہوا، گاڑی میں کچھ بزنس مین سوار تھے، یہ ایک روڈ ایکسیڈنٹ ہے جس کی تحقیقات جاری ہے۔
ترجمان جے یو آئی کے مطابق وفاقی وزیر مذہبی امور مفتی عبدالشکور کی نماز جنازہ کل بروز اتواربوقت دو بجے دن تاجبی خیل لکی مروت میں ادا کی جائے گی۔
وفاقی وزیر مذہبی امور و امیر جے یو آئی فاٹا مفتی عبدالشکور کی نماز جنازہ کل بروز اتوار بتاریخ 16 اپریل بوقت دو بجے دن تاجبی خیل لکی مروت میں ادا کی جائے گی ۔
میڈیا سیل جے یو آئی پاکستان
— Jamiat Ulama-e-Islam Pakistan (@juipakofficial) April 15, 2023
صدر مملکت، وزیراعظم اور دیگر شخصایت کا عبدالشکور کے انتقال پر افسوس کا اظہار
وزیراعظم شہباز شریف نے مفتی عبدالشکور کی موت پر رنج وغم اور افسوس کا اظہار کیا جب کہ اہل خانہ اور تمام وابستگان سے اظہار ہمدردی اور تعزیت کی ہے۔
ایک بیان میں شہباز شریف نے کہا کہ مفتی عبدالشکور ایک نظریاتی سیاسی کارکن اور نیک انسان تھے، مفتی عبدالشکور جمعیت علماءاسلام (ف) کے متحرک رہنما تھے جنہوں نے وزیر مذہبی امور ایمانداری سے فرائض انجام دئیے۔
صدرمملکت ڈاکٹر عارف علوی نے مفتی عبدالشکور کے انتقال پر اظہار افسوس کرتے ہوئے مرحوم کی بین المذاہب ہم آہنگی کے لئے خدمات کو خراج عقیدت پیش کی۔
سربراہ جے یو آئی (ف) مولانا فضل الرحمان نے کہا کہ مفتی عبد الشکور کی وفات بہت بڑا نقصان ہے، مرحوم کی خدمات کو ہمیشہ یاد رکھا جائے گا، عبد الشکور درویش صفت انسان تھے، یہ غم صرف ان کے اہل خانہ کا نہیں ،میرا اور پوری جماعت کا غم ہے۔
خیال رہے کہ جمعیت علمائے اسلام (ف) کے رہنما اور وفاقی وزیر برائے مذہبی امور مفتی عبدالشکور قومی اسمبلی کے حلقے این اے 51 سے متحدہ مجلس عمل کے ٹکٹ پر رکن اسمبلی منتخب ہوئے تھے اور پی ڈی ایم کی حکومت آنے کے بعد وہ وفاقی وزیر کی حیثیت سے خدمات انجام دے رہے تھے۔
