واپس چلے جاؤ ورنہ سردی میں ٹھٹھر کر مر جاؤ گے، چینی فوج کا بھارتی فوج کو پیغام
ویب ڈیسک (9نیوز) اسلام آباد
لداخ میں پینگونگ تسو جھیل کے شمالی کنارے پر چینی فوجیوں نے بھارتی فوج کا دھیان بٹانے کیلئے میوزک کو بطور ہتھیار استعمال کرنا شروع کر دیا، جھیل کے جنوبی کنارے پر لاؤڈ سپیکروں پر جہاں ایک طرف پنجابی گانے چلائے جا رہے ہیں وہیں بھارتی فوجیوں کو ہندی میں مخاطب کرتے ہوئے کہا جا رہا ہے کہ شدید سردی میں بلندیوں پر وقت ضائع نہ کرو، واپس چلے جاؤ ورنہ سردی میں ٹھٹھر کر مر جاؤ گے۔
ایک بھارتی فوجی افسر نے اس حوالے سے دعویٰ کیا ہے کہ لداخ میں نومبر کے بعد شدید برفباری ہوتی ہے جوکہ 40فٹ تک دیکھی گئی ہے۔ درجہ حرارت منفی 30 سے 40 ڈگری تک گر جاتا ہے۔ شدید سرد ہوائیں چلتی ہیں اور برف کے باعث سڑکیں بند ہو جاتی ہیں، بھارتی فوجی شدید سردی میں جنگ لڑنے کا خاطر خواہ تجربہ رکھتے ہیں اور انہیں شارٹ نوٹس پر کارروائی کی نفسیاتی تربیت بھی دی گئی ہے۔
بھارتی خبر رساں ادارے سے گفتگو کرتے ہوئے ایک سابق بھارتی آرمی چیف کا کہنا تھا کہ 1962 کی جھڑپوں اور 1967 کی ایک جھڑپ کے دوران بھی چینی فوجیوں نے بھارتی فوج کا دھیان ہٹانے کے لیے سپیکر پر پنجابی گانے چلائے تھے۔
دوسری جانب نے برطانوی خبر رساں ادارے رائٹرز کےعہدیدار نے بتایا کہ مغربی ہمالیہ میں پچھلے مہینے کے اواخر میں بھارتی اور چینی فوج کے درمیان میں فائرنگ کے 3 واقعات سامنے آ چکے ہیں، جس میں شکر ہے کہ دونوں فوجوں نے ایک دوسرے پر سیدھا فائر نہیں کیے بلکہ ہوائی فائرنگ کی۔
Share
رائٹرز کے ایک اور عہدیدار نے بتایا کہ ہوائی فائرنگ کا ایک واقعہ پینگونگ تسو جھیل کے شمالی کنارے پر بھی پیش آیا جب گزشتہ جمعرات کو ماسکو میں بھارت کے وزیر خارجہ سبرامنیم جے شنکر اور چینی ہم منصب وانگ یی کے مابین ملاقات ہونا طے تھی، ذرائع کے مطابق شدید فائرنگ میں دونوں جانب سے 100 سے 200 کے قریب راؤنڈ فائر کیے گئے، جس میں دونوں جانب کے فوجیوں کا کوئی جانی نقصان نہیں ہوا۔
